السبت، 5 فبراير 2011

الرد على التلفزيون المصرى ياريت كل واحد يصورها ويوزع عشر نسخ منها ويقول لكل واحد يخلى اكتر عدد يقراها

يا جماعة، حرام... الأشغال واقفة والمدارس والجامعات واقفة... إحنا قاعدين في بيوتنا مرعوبين... مفيش أمان والرجالة واقفة طول الليل تحرس بيوتها... ومحدش عارف ينزل من بيته... الناس مش عارفة تقبض.... الناس مش لاقية تاكل... الاقتصاد بيروح والاستثمار بيروح.... والسياحة بتتضرب والبورصة وقعت.... أنا بشتغل باليومية كل يوم 15 جنيه، أجيب منين أنا؟... أنا أهلي عايشين بره وحيموتوا من القلق علي... أنا صاحبي مات إمبارح وهو واقف بيحرس العمارة... إنتوا عايزين إيه؟ عايزين تخربوها؟ حرية إيه ودستور إيه؟ المهم الاستقرار اللي هو عماد أي دولة... وبعدين يعني يرضيكم الراجل في السن ده وهو الرئيس والأب يمشي من غير كرامة خصوصاً بعد كل اللي عمله للبلد في الحرب؟ فضحتونا في الفضائيات وخليتوا الدول كلها تشمت فينا... استمعوا لصوت العقل وارحمونا بقى.....صح ولا إيه؟
إيه... مسمعتوش؟ أيوة... إيه، وستين إيه كمان.... بالراحة بس... اقروا لحد الآخر... زي إخواتكم
ممكن ناخد كل الشكاوي دي واحدة واحدة؟
الأشغال واقفة:صح... طب هو إيه اللي وقفها؟ المظاهرات والناس اللي بايتين في الشوارع والفوضى اللي عملوها. صح؟ لأ مش صح. لو ترجع بذاكرتك 11 يوم للوراء وبالتحديد يوم الثلاثاء 25 يناير اللي هو يوم بداية الثورة، كان فيه شغل... والأربعاء كان فيه ثورة، وكان فيه شغل... والخميس كان فيه ثورة، وكان فيه شغل. أنا عن نفسي رحت الشغل وحتى المرور كان عادي كمان، إيه رأيك بقى؟ والجامعات والمدارس الصبح برضه، قفلوها ليه؟ غير كده، المدارس كانت السنة اللي فاتت في أجازة شبه دائمة عشان أنفلونزا الخنازير، وبعدين دي الثورة حتخللي فيه ميزانية للتعليم، عشان يبقى عندنا تعلم بجد، مش الهبل اللي حاصل ده.
إحنا قاعدين في بيوتنا مرعوبين ومفيش أمان والرجالة واقفة طول الليل تحرس بيوتها ومحدش عارف ينزل من بيته:عشان المظاهرات ولا عشان حظر التجول؟ طب هم المتظاهرين اللي عملوا حظر التجول؟ ولا النظام اللي مش عارف يتصرف مع مظاهرات سلمية؟ بلاش دي، مين اللي أجبر الأهالي يشتغلوا شغلة الشرطة؟ لما الدكتور والمهندس والطالب والموظف يضطر يمسك شومة عشان يحمي أهله، كان مين السبب؟ المتظاهرين؟ المتظاهرين اللي قالوا البلد ميبقاش فيها شرطي واحد يحميها؟ المتظاهرين اللي طلقوا البلطجية والحرامية والمجرمين عالبلد ولا الداخلية؟ لما الجيش ينزل الشوارع ويبقى صوت مرور دبابة جنب البيت ده صوت مألوف، بل ومحبب ويشعر الناس بالأمان... مين السبب؟ المتظاهرين ولا الداخلية اللي انسحبت من مواقعها وسابت الشعب يواجه البلطجية اللي هي برضه اللي جابتهم وهو أعزل وبطوله؟ بيربوا الشعب... حرية وفوضى ولا قهر وأمان؟ بيربونا والله

الناس مش عارفة تقبض.... الناس مش لاقية تاكل... الاقتصاد بيروح والاستثمار بيروح:هو مين اللي قفل كل المصالح؟ مين اللي قفل البنوك؟ مين اللي منع نقل البضائع بين المدن لما قفل الطرق؟ مين اللي قرر يوقف كل الأنشطة الإقتصادية في البلد؟ مش الحكومة؟ ولو قلتلي مهم عملوا كده عشان السرقات والتخريب حنرجع لنقطة إن الداخلية هي اللي أجرتهم، ولو قلتلي عشان حظر التجول، هو كان مين اللي فرضه؟ وبعدين تعلالي هنا... إنت ناسي إن لما الثورة تحاكم الناس، حناخد فلوسنا اللي نهبوها؟ تخيل ثروات ناس زي أحمد عز وجمال مبارك لو بقت ملك الشعب؟ تخيل لما إيرادات قناة السويس تبقى موارد للدولة مش لرئاسة الدولة؟ تخيل لو المدن السكنية اللي على أرارضي الدولة بقت ملك الدولة وبقت أسعارها تناسب دخول المواطنين؟ تخيل حجم الاستثمار في بلد مش بتتعامل بالرشوة والمحسوبية والمصالح الخاصة؟

السياحة بتتضرب:هو مين اللي استخدم عنف غير آدمي وقنابل ورصاص وكملها لما عمل حظر تجول ورعبهم لحد ما مشيوا؟ المتظاهرين؟

والبورصة وقعت:أي خسارة في البورصة دلوقتي هي خسارة تقديرية مش خسارة حقيقية... الخسارة الحقيقية في البورصة لما تبيع السهم بأرخص من تمنه، إنما لو مبيعتوش وفضل عندك، هو خسران تقديرياً بس. يعني أول ما الدنيا تتصلح حتعلى قيمة الأسهم تاني وتبقى مخسرتش حاجة.الى فى التحرير ايرانين وخونة وامريكان ويهود وروس
طيب ومين المسئول عن ده مش المخابرات العامة ومين سمح لثمانية مليون عميل يدخلو البلد 
الناس دى بتنفذ اجندات امريكية واسرائيلة
طيب والنظام الحالى هو قائد قوى الممانعة فى العالم  ومين بييبيع الغاز لاسرائيل ببلاش ومين بيحاصر غزة وميين منبطح لامريكا واسرائيل

أنا بشتغل باليومية كل يوم 15 جنيه، أجيب منين أنا؟
وهو ده طبيعي؟ لما يبقى دستور بلدك بيقول إن فيه.... إستنى إستنى، والله لاجيبلك مواد الدستور الحلوة عشان تصدقني: "العمل حق وواجب وشرف تكفله الدولة، ويكون العاملون الممتازون محل تقدير الدولة والمجتمع. ولا يجوز فرض أى عمل جبرا على المواطنين إلا بمقتضى قانون ولأداء خدمة عامة وبمقابل عادل". وخد دي كمان: "تكفل الدولة خدمات التأمين الاجتماعى والصحى، ومعاشات العجز عن العمل والبطالة والشيخوخة للمواطنين جميعا، وذلك وفقا للقانون." يعني مش بس من حقك تلاقي شغل وبمقابل عادل، ده إنت كمان لو مالقتش، ليك تعويض. إنت متخيل الظلم اللي إنت فيه؟ لما رئيس دولتك يقوللك مانتو بتخلفوا كتير، أأكلكم منين؟ هم المتظاهرين اللي كتير منهم أصلاً معاهم فلوس حيتظاهروا ليه؟ دول طالعين عشانك إنت قبل أي حد... يا راجل ده إنت أصلاً اللي المفروض تتظاهر.. بس ولا يهمك، رقبتنا سدادة... وإنت أول حد لازم ياخد حقه أول ما تنجح الثورة.

أنا أهلي عايشين بره وحيموتوا من القلق علي:وهم لو كانوا لقوا شغل محترم هنا كانوا سافروا أصلاً؟ راجع السابق. بالإضافة، شغل بره يعني ممكن أوي يكونوا متبهدلين، عشان الحمد لله خارجيتنا مش بتعبرنا ولا بتحمينا بره... وده كمان لازم يتغير

أنا صاحبي مات إمبارح وهو واقف بيحرس العمارة:مش بس حقولك راجع ردّي على موضوع البلطجية... حقولك إن اللي ماتوا عشان إحنا نرتاح دول من سن صاحبك... وعندهم صحاب برضه... وزي ما صاحبك مات شهيد عشان بيدافع عن بيته، هم كمان ماتوا شهداء عشان قضيتهم... اللي هي في الأصل قضيتنا كلنا لو فكرنا.

إنتوا عايزين إيه؟ حرية إيه ودستور إيه؟ المهم الاستقرار اللي هو عماد أي دولة. إنتوا عايزين تخربوها؟
أيوة إحنا عايزين حرية، مالها؟ إنت دقتها؟ عارف يعني إيه إنك تقول رأيك من غير خوف؟ عارف يعني إيه أنك تختار مبن يحكمك؟ ولو طلعت غلطان ولا طلع مش كويس تحاكمه وتمشيه وتجيب غيره؟ أنهي استقرار و فيه طوارئ؟ أنهي استقرار وأي ضابط ممكن يجيبك ويفتشك ويحبسك لو شكلك مش عاجبه وتفضل محجوز لحد مايبانلك صحاب، ده طبعاً غير اللي حتشوفه وإنت محجوز؟ تصدق إن دستورك بيقول إن لازم يتقالك مقبوض عليك ليه؟ وإن فيه شروط لأماكن الاحتجاز؟ وإن حتى لو طلعت مجرم، مش من حق حد لا يعذبك ولا حتى يهينك؟ يا راجل، ده على رأي صديق لي: أنا مش عارف حتى أربي دقني، حتى لو كنت بربيها عشان شكلي عاجبني كدة مش أكتر. وبعدين مين اللي يخربها؟ الشباب اللي نزلوا وهم محتسبين الشهادة عشان مض ضامنين يرجعوا بيوتهم على رجليهم، وفي وقت فراغهم لما ميكونش حد بيضربهم بينضفوا الشارع وينظموا المرور ويعاجوا المصابين منهم ومن اللي ضربوهم؟ طب أقولك حاجة؟ الشباب دول لقوا عسكري أمن (كان لسة بيرمي عليهم قنابل) متصاب، عالجوه ولبسوه مدني عشان محدش يكون غضبان فيؤذيه. طب أقولك حاجة تانية؟ الشباب دول كتير ومن طبقات مختلفة وفي وسطهم بنات كتير، محدش فكر يضايقها بفعل أو كلمة، والله ولا حتى بنظرة. أنا نزلت وشفت بنفسي. أنا عمري ما كنت أتخيل أبقى حاسة بأمان وحواليا العدد ده من الشباب... بس بجد كانوا خايفين علينا ولا لما نكون إخواتهم.

وبعدين يعني يرضيكم الراجل في السن ده وهو الرئيس والأب يمشي من غير كرامة خصوصاً بعد كل اللي عمله للبلد في الحرب؟
محدش يقوللي كلمة أب ديه، أنا أبويا راجل محترم، بيخاف عليا من الهوا، مش حيسلط عليا بلطجية، مش حيطلق عليا رصاص حي، وللي بيقولوا ميعرفش، دي تبقى أنيل وأنيل.. وبعدين معرفش قبلها، معملش حاجة بعدها ليه؟ ولا معرفش برضه؟ إيه؟ معندوش تليفزيون؟ أما موضوع الحرب ده، فإرحمونا بقى... السادات هو صاحب نصر أكتوبر قيادياً وشهداء أكتوبر واللي حاربوا هم أصحابها فعلياً... تعرف إن كل اللي عموله إنه هو اللي أمر بالطلعة الجوية من على الأرض؟ يعني حتى مطلعش. وبعدين الحاكم مش أب، ولا إله... موظف في الدولة، بيشتغل عند الشعب... يعني لو مش يؤدي وظيفته صح، يتحاكم ويمشي... عادي جداً.
ضحتونا في الفضائيات وخليتوا الدول كلها تشمت فينا.لو حنتكلم على الفضائيات العربية والغربية، والله لو كان اللي في التحرير لقوا حد معبرهم في التليفزيون المصري، كانوا كلموه... ربنا يخلي أنس الفقي بقى... ده لما كانوا الشباب بيتضربوا في التحرير، كان التليفزيون المصري بيعلن نبأ "عاجل" عن ثلاثة مسلحين بيقتحموا "بقالة" في الدقهلية... ناس بيترمى عليهم مولوتوف والمتحف المصري بيولع، وده مركز مع بقالة. والله واحدة صاحبتي كانت حتتشل فيها. أما الشماتة، فياريت تتفرج على رسائل الأخوة العرب في فضائياتهم، إلا ما فيه حد فيهم غير وبيدعيلنا بالنصر. الجزائريين بيعتذروا، واللي كانوا شايفينا خونة وعملاء بيقولوا في إتظار مصر لتخرج وتقود العرب. أما الأجانب، فمبهورين بإن الشعب اللي كان طول عمره متخلف وفوضوي خارج عشان يطالب بحقوقه وبيتظاهر بأعداد غفيرة وفي منتهى النظام والتحضر.

استمعوا لصوت العقل وارحمونا بقى
أظن بعد كل اللي قلته ده، باين صوت العقل يقول إيه. ولله مقدرين إن الناس تعبانة، بس هانت... زقة واحدة... وبعد كل ده، أنا مع إن الشباب يروحوا أول ما قرار مجلس الحكماء يتوافق عليه... بس نضمن حقوقنا وبعدين يروحوا، اصبروا شوية... هانت
منقول عن Nahla Anwer ©2011 مع بعض الاضافات ويسمح بنقلها وتعديل والاضافة

هناك 15 تعليقًا:

  1. ربنا يباركلك
    ربنا يتقبل منك , المشكلة عندنا في الوعي والأولويات
    ودي ظهرت جامد في الفترة دي والمفروض ده نشتغل عليه الفترة الجاية نشر الوعي وتعلم فقه الأولويات

    ردحذف
  2. يسلم فم أمك
    والله العظيم انت برنس

    ردحذف
  3. انا تعبت من الرد على الى مش فاهمين بس المقالة دى هتخلينى ما اردش الى هيدوشنى هديهاله يقراها واريح نفسى
    تسلم ايدك وتسلم دماغك بنت مصر بجد

    ردحذف
  4. الله ينووور

    هو ده الكلام

    اسمحلي انقل التدوينة دي في كل حته باسم المدونة عشان بجد لازم الناس تفهم بقى
    حرام كفايه والله العظيم
    مهو مش الدولة والعشب بيضغط على الشباب الرجاله اللي في كل حته في مصر دول

    ردحذف
  5. tslam lemasr , rabena yekramak yabny ,

    ردحذف
  6. لأارد عليك انا يا باشا
    بالنسبه للشغل اللى واقف فا ده انتو السبب فيه عشان تلت تربع الناس اللى شغاله فى البلد دلوقتى بيشتغلو مع قطاعات خاصه و مستثمرين و الناس دى عمرها ما هاتضحى برؤس اموالها و تفتح وانتو لسه عاملين البلبله دى وانا عندى اصحاب كتير شغالين فى شركات خاصه كل اصحابها سافرو بره و يصفو استثماراتهم هنا بسببكو انتو عشان انتو لو روحتو الدنيا هاتهدى تانى.
    اما بالنسبه للاحساس بعدم الامان فا ده محتاج للاجهزه الامنيه انها ترجع تانى فى اماكنها و كل جهاز يشوف واجاباته الاصليه بدل ما يبقى كل تفكيره دلوقتى هوه تامين حضراتكم او تامين الاماكن الهامه اللى خايفين من انها تتخرب او تتنهب من المجرمين اللى هربو من السجون و بعدين احنا كل اللى انا شايفه فى ردك هوه حاجات كانت بتحصل قبل 25 يناير او قبل الخطاب الاخير للرئيس و كلنا عارفين دلوقتى ان الوضع اتغير بسببكو انتو و كلنا معترفين بكده لكن اللى مش معترفين بيه هوه اصراركم الغريب بالاستمرار رغم تنفيذ اغلب طلباتكم
    و عموما عشان ماطولش اقفرو اللينك ده وانتو تعرفو الرد
    http://www.facebook.com/note.php?saved&&note_id=123861394354507

    ردحذف
  7. أنا موافق علي كل الكلام الجميل ده بس عندي تليق بسيط لإني أنا كمان مفقوع من الغيظ:
    أعتقد ان كل واحد منصف شاف الأحداث من أولها عارف كويس إن فيه تجاوزات وإن فيه مظالم.
    وأكيد كل واحد نزل المظاهرة كان في قرارة نفسه عارف إن فيه عنف متوقع إنه يحصل وبالتأكيد قبل النتيجة حال وقوعها.
    وشفنا كلنا المظاهرات في كل الدول المتقدمه والمتخلفة وشفنا قوات مكافحة الشغب بتفض المظاهرات ازاي؟ أظن ما شفناش حد بيوزع بنبوني علي المتظاهرين ، وعارفين كمان ان فيه إن روح القطيع بتظهر في الزحام الشديد وإن الأمور بتخرج عن السيطرة.زي السواق المذعور اللي كان طاير فوق اكتوبر ونازل طحن في الناس.
    لكن شفنا كمان ردود فعل إيجابيه حصلت من النظام بعد المظاهرات وتغيير كبير حصل في الحوار وعارفين إن مشوار التغيير لسه طويل جدا ومنتظرين الكثير والكثير.
    تعرفوا تقولوا لي هما البلطجيه دول كمان من كوكب تاني والا مصريين تفتكروا هما كمان مش محتاجين تقويم وتغيير.
    وباقي الشعب المصري اللي الفساد فيه للركب زي ما قال زكريا عزمي مش محتاج تغيير هو كمان يا حضرات الفساد زي ما هو في القمه منتشر كمان في القاعدة العريضة لو نزل ملك من السما عشان يصلح الفساد اللي عايش جوانا مش ها يعرف إلا لما احنا نفسنا نتغير .
    عايزين تقنعوني إن المتظاهرين دول كلهم من غير أخطاء أمال مين اللي اللي مبهدلنا في دواوين الحكومة والمحاكم واقسام الشرطة ومكاتب الشهر العقاري ودهاليز الحكم المحلي والمرافق والكهرباء نهايته القايمة طويله وعريضة وكل دول في المظاهرة عمالين يشتموا في النظام هو فيه إيه يا جماعه انتم ها تعيشوا في الوهم هو كل اللي عنده وجيعه يرميها علي رئيس الجمهورية حتي اللي مش عارف يربي عياله عمال يحط غله في رئيس الدولة.
    نفسي اعرف كل اللي في المظاهرة دول ملايكه امال مين اللي منكد عيشتنا هو مبارك بس اللي عامل فينا كل المصايب دي.
    أعطيكم مثال الساده الممثلين اللي نازلين تمثيل علينا في المظاهرات يا تري سألتوهم دفعوا الضرايب اللي عليهم للشعب والا بيقبضوا بالدولار بشرط الأجر يستلموه في الخارج.
    اصحوا يا ناس كلنا حسني مبارك زي ما احنا بنعاني من الفساد هو كمان بيعاني لكن أضعاف أضعاف اللي بنعانيه هو ها يلاحق علي مين والا مين والا مين احنا بسم الله ما شاء الله سبعةوتمانين مليون نسمه وكل واحد فينا لسانه بينقط عسل ومش فالحين غير في النقد عمال علي بطال والشماعة دايما جاهزة أصل النظام فاسد.
    نروح الجامعه طلبه طول السنة مقضياها تسكع مع البنات وآخر السنة مذكرة وبرشام والعيب علي النظام .
    نروح لأي موظف مرتشي يمدلك إيده أو يعطل مصالحك والعيب عالنظام وهكذا وهكذا دلوقتي النظام هو سبب كل المصايب .
    باختصار لازم كل واحد فينا يتغير.
    لازم نبطل زعيق ونسمع لبعض شويه أنا أعصابي تعبت من يوم 25 للنهارده شتايم وانفلات ومحدش له كبير عيب علينا اللي بيحصل ده......

    ردحذف
  8. بكل بساطه الى زعلان وعايز يهدى اعصابه يروح اى قصر من اياهم او يجلس فى اى مكتب برضه من اياهم وياكل اى اكله يختارها وحيلاقى فى درج اوادراج المكتب منويهات مطاعم فرنسا او ايطاليا بس ماينساش يغمس بالمصرى من غير مايلبس مصرى والا اقوله ميفتكرش مصر عشان مايقلش يع

    ردحذف
  9. برافو عليكى بجد أحسن رد لكل الناس اللى بدأت تزهق و تهاجم الثورة. أشكرك

    ردحذف
  10. الحمد لله أنه هنالك من لهم بعد النظر و جلاء البصيرة و قوة الإيمان. نصركم الله و ثبت أقدامكم و ألقي الرعب في قلوب الطغاة الظلمة.

    ردحذف
  11. اغبى اعلام شفته فى حياتى سواء اكان اعلام خاص او حكومى هو الإعلام المصرى

    ردحذف
  12. توضيح بسيط هنا، لأن الموضوع أهم من مسألة يومية أو تأخير مصالح:
    http://www.youtube.com/user/EgyYouth

    شكرا

    ردحذف
  13. صح الناس اللى هربت برؤس اموالها دى المتظاهرين السبب فيها ليه عشان هما اللى فتحوا الاقسام والسجون وراحو معاهم يسرقوا من مكاتب بعيناها وكمان هما اللى راحوا يفتشوا شقق الاجانب ويخفوهم ويقللولهم مش عايزينكم وهما برده اللى ضربوا الاجانب فى الشارع
    يا اخى سبحان الله فى ثورات بتفشل وتنجح وتخلص وتبدا ومطالب وحاجات تيجى وتروح لاسباب سياسيه لكن عمرى ما شفت ثوره تخلص عشان العيال عندها مدرسه وعايزين نروح الشغل وناكل عيش وناكل على قفانا طبعا لانهم متلازمين مع بعض يعنى قله الكرامه وصلت اننا نخلى جزمته فوق راسنا عشان نطفح السم بالذل
    مفيش حريه تيكاوى ومفيش ثوره من غير تبعات ولاجل الورد يتسقى العليق لازم نتبهدل شويه ونتعب شويه ووجع ساعه ولا كل ساعه لو سبت التفاحه الفاسده فى وسط السله حتى لو بدلت التفاح اللى حواليها هاتفسد الجديد برضه انتو ليه مش بتفهمو

    ردحذف