قصيدة الثورة فين ؟
ــــــــــــــــــــــــــــــــــــــــــــــــــــــــــــــــــــــــــــــــ
صـباح نضـيف يـامـعـلمـين .. صبـاح شـريف .. سـؤال خـفيف ..الثورة فيـن ؟
ــــــــــــــــــــــــــــــــ
الثورة فين ؟
الثـورة قـامـت إمـتى طيـب حـد فـاكر ؟ يـوم التـلات ؟
طـب حـد فـاكـر إسـم حد اتصاب ولسـه عـايش أو حـتى مـات ؟
طب حد عارف أد إيه اللي اتعموا ؟ طب حـد فـاكر اسم واحده من اللي ماتوا من البنات ؟
طب حد فاكر الغـاز والعـياط ؟
طـب حـد فـاكر نـومنـا قـدام المجمع ع البـلاط ؟
حد فاكر اللي ماتوا في الانفلات ؟
طـب حـد فـاكر أي حـاجه مـن اللي فـات ؟
حد عارف هم ودوا الثورة فين ؟؟
لو سمـحت الثـورة فيـن ؟
الثـورة ويـاك يـابن عمي ؟
عندك يابويا ؟ عندك ياأمي ؟
معـاك يـاكـابتن ؟ كـانـت هنا مشـفتهـاش ؟ شبـهنا ولابسه زيـنا ملمـحتهـاش ؟
الثورة اهي ؟
أيـوه صح الثورة اهي ..
بس لابسه الميـري ليـه ؟ !
هي لابسـه الميـري ليـه ؟ !
الثـورة لابسـه الميـري ليـه ؟!
قطعـولهـا لبسـها ولبسـوها الميـري ليـه ؟ !
ـــــــــــــــــــــــــــــــــــــــــــــــــــــــــ
هم العسكر خطفوا الثوره ؟.. ولا يكونشي الثورة دي عوره ومخبيها الشيخ أباري ؟
ولا يكونشي الشيخ أباري هو وشلة جيش النورة .. متفقين يتقاسموا فداري ؟
ولا يكونش كمان الثورة تبع التجنيد الإجباري ؟
ــــــــــــــــــــــــــــــــــــــــــــــــــــــــــ
في حد يإتمن العساكر ؟ طب يابني ذاكر ..
ماقالولنا ثورة وبردوا ركبوها العساكر
والعساكر لما مات العسكري بردوا ركبوها العساكر
والعساكر لما قتلوا العسكري وسط العساكر بردوا ركبوها العساكر
واللي فاكر ان ثورة مصر قامت فانتهي حكم العساكر مش مذاااااااااااااااكر
والعيب لا علي العساكر.. ولا ع اللي بيعبدوهم .. ولا ع اللي مغيبين ..
العيب عليكي .. العيب عليكي ياثورة المؤدبين
وبتسألوني الثورة فين ؟
ــــــــــــــــــــ
الثورة كانت في الميدان زي النهاردة ..
واختفت لما جه الغربان ولما النسر عدى
ضحك علينا النسر وقال هيحمينا..غلابة احنا وسلمناله ونسينا.. نسينا إنها قامت علي إدينا ..
و النسر والغربان أساسا قاموا بالثورة المضادة ؟
وبتسألوني الثورة فين ؟
ـــــــــــــــــــــــــــــــــــــــــــــــــــــــــ
الثـورة فجيـوب العسـاكر .. ولا عزاء للكـتيـانيـن ؟
الثورة فإدين اللي بيبيحوا الدياثة .. وبيقولوا دين ؟
الثورة ناسها متمرمغين في الطين ..
الثورة قاطفين وردها
الثورة هاتكين عرضعا
الثورة إحنا معاها والعساكر ضدها
الثورة لو بتحبها .. رجعها من إيد الغجر والسفاحين ..
الثورة فين ؟
ـــــــــــــــــــــــــــــــــــــــــ
الثـورة قام بيها الشباب الطيبين ؟
وحصـد كراسـيها اللي كـانوا منفـضين ومأنتـخين ؟
واللي ماشيين بالجـذم جوه روسنا من سنين ؟
..............
أغـبيا والغـبا ..عنـد بعـض النـاس هـواية ومـوهبة
حطوا روسهم بين سنان العقربة
وبالأماني بيحلموا وبالأمل مستنيين ..
متغيبين مش طيبين متغيبين
................
متعلموش ومحرموش من العساكر ! وعمالين يهلفطوا ويكفروا ويهلوسوا
تقـولهم أنا اخوكو ... دول طول حياتهم بيبعوكوا .. ولا حـد فـاكر .. طب البسوا
تقولهم هينفخوكو .. العسكري عنده خازوق بيأنتكه ويهندسه ..
يغضبوا ويكفرونا يقولولنا عيب بس اخرسوا ..
العسكري يارب ربنا يحرسه ..
طب مرتاحين ؟!!!!!
أهو نصنا قاطع وبيموت في الميدان .. ونصنا في البرلمان .. نواب ورق واتقرطسوا !
يلا البسوا ومتسألوش الثورة فين ..
ــــــــــــــــــــــــــــــــــــــــــــــــــــــــــــ
آه يـابلد تـدي الفـرص لحورتجي
آه يابلد فيكي الشـهيد بقـه بلـطجي
والسفيه عامل مناضل ثورجي
واالثورجي بيقولوا عنه مستفيد وأونطجي
وبيحكمك حبـة عجـايز عيـانين
جاوبيني قولي الثـورة فيـن ؟
ـــــــــــــــــــ
أه يابلد عاشقة اللي داسك
اه يابلد ملعوب فجدرك وفأساسك ..
ناسيه اللي كان بيموت ووطي علي أرضك وباسـك ؟!
بتبعينا ؟!
بتبعينا وتحضـني فــكـلاب ياطيبه بيقتلونا .. ياطيبه دول أخرهم يبقوا دواسه لمداسك ؟
احنا حراسك ياطيبه احنا ناسك
ناسيه خالد ؟ ناسيه مينا ؟ ناسيه بسيوني وبنونه ومصطفي وسالي وحسين ؟
إخييي ياطيبه
طب فاكره مين ؟
ياطيبة قولي الثورة فين ؟
ـــــــــــــــــــــــــــــــــــــــــــــــــــ
ياعالم هو ذمب اني بالحرية بحلم ؟ هو ذمب لما ادافع عن كرامتي ؟
ذمب اقول للي حاكم أرضنا .. مش هنقبل فينا تظلم ؟
ذمب أقول للي هاتك عرضنا .. إنت مجرم .. ؟
هي ناس بتموت .. وناس تحكم ؟
هي ناس تتعمي .. وناس بالعمي تتحكم ؟
و ناس بالدم تتغطى وناس بالدم تتوضي .. ؟!
وناس للقبلة بتصلي .. وناس للمجلسين تحرم ؟!
وناس بتموت عشان غيرها .. وناس كسلانه تترحم ؟!
يارب ياللي من العباد أحكم .. أحكم ..
يارب اخوبا مات .. واخوبا التاني بيقولي ياكافر ياللي مش مسلم !
واختي عراها اليهود .. اختي عراها الجنود .. واخويا فعرضها اتكلم ..
واخويا بيتعمي وبيشوف ..
واخونا بيرتعش م الخوف شايفنا وشايف الظالم لكنه كفيف
اخويا اعمي وكمان ابكم
ـــــــــــــــــــــــــــــــــــــــــــــــــ
اه يابلد فيكي الشهيد مجرم
أقولك نفسنا نجيلك .. اجيلك الاقي بيني وبينك عسكري محرم !
نثور ماسكين قناديلك .. نجيب أحلامنا ونجيلك .. وفرقابنا بنحنيلك .. وبردوا قفانا يتعلم!
نثور ونموت عشان قلبك عشان منك وبنحبك وبردوا قفانا يتعلم !
بسيطة هثور تاني وهتعلم
وهربط جرحي واتألم بسيطة
هثور تاني واموت تاني وهفرد روحي ليكي طريق وعضمي مرتبة وسلم بسيطة
هلم فجوفي احباطي هقطع كل ابياتي وهكتب ليكي شعر جديد بدمي ياطيبه ع الحيطه بسيطة
هكمل .. ولو إيدي فرجليا وفرقبتي بألف كلبش مربووطة بسيطة
هكمل .. ولو أعمى ولو محبوس .. ولو هتدوسني كل مدرعات إبليس .. تدوس
ولو فوق راسي ألف سلاح.. ولو كل اللي فيكي رخيص ..
ولو مفضلش غير انتي وسجانك وكل خسيس ..وانا لوحدي .. هكمل ..ولو وحدي هكمل
اتعمي اتصاب اموت .. وتفضلي علي راسي محطوطة بسيطة
وبعد ما اموت أمانة يامصرتتعافي .. وشوفي النور علي اكتافي ..
وفوقي ياطيبه الطيبه بلاش طيبه العساكر زي الديابة حويطة
وقولي للعبيد تخرس .. ولولادك تقوم تحرس .. وطول ما فيكي المخلصين
هتبقي عارفة الثورة فين .
